ساعة براغ الفلكية
موجودة في براغ عاصمة التشيك
تعتبر تالت أقدم ساعة اتعملت
وأقدم ساعة لسه شغالة لحد الآن
شغالة من 600 سنة
بتدق كل ساعة
وبتعرض حالة الكون بدقة متناهية
مثلًا بتعرض مكان الشمس والقمر في الفضاء
والوقت التشيكي ، والبابلي زمان
وتفاصيل فلكية مختلفة
شارك في إنشائها العديد
لكن هانّوش" كان هو المنفذ الرئيسي لها
طبعًا كانت شىء مذهل
وجذبت العديد من السياح من كل البلدان
لدرجة إنه كانت الناس زمان ( ولحد دلوقتي )
بتتجمع قدامها قبل ماتدق بربع ساعة
عشان يشوفوا العمل الجميل ده
والعرض المميز اللي بتعمله
وده حقق فلوس كتيرة للبلد
وخلّى جشع مستشاري البلدة زمان
إنهم يتسببوا في إصابة "هانّوش" بالعمى
عشان ميقدرش ينشىء ساعة تانية في أي مدينة أخرى
وك انتقام من "هانّوش"
صعد أعلى البرج اللي فيه الساعة
وألقى بنفسه داخلها وهي شغالة
وبالفعل تسبب في تلفها
وبوّظ آلية التشغيل بتاعتها
وفضلت اكتر من 100سنة محدش كان عارف يصلحها
طب ايه هو العرض المميز ؟
أولًا : محتاجين نعرف شخصياته
هنلاقي فيه 4 تماثيل صغيرة ع الجانبين
بيمثلوا أكتر الأشياء اللي الناس كانوا بيخافوا منها
في مدينة براغ في هذا الوقت
على الشمال :
واحد ماسك مراية بيبص لها، بيمثل الخوف من الغرور
وجنبه تمثال ماسك شنطة فيها فلوس
وده بيمثل الخوف من الطمع ، والجشع
على اليمين :
هيكل عظمي ، بيمثل ملك الموت
إيد ماسكة حبل بيرن الجرس، والتانية فيها ساعة رملية
وفي أسطورة بتقول إنه بيتنبأ بالمستقبل
وبيقول إن المدينة هتعاني لو الساعة اتعطلت لوقت طويل
واللي جنب الهيكل
بيمثل الخوف من المتعة، والبذخ، والفساد البشري عمومًا
(ويُقال أنه بيمثل خوف الشعوب في أوروبا الوسطى والشرقية
من غزو الامبراطورية العثمانية )
وفوق فيه ديك ذهبي صغير ، ده بيمثل الحياة
كل ساعة ، تتفتح نافذتين ، ويظهر منهم رُسل المسيح
وملك الموت بيرن الجرس
والتماثي الصغيرة بيهزوا راسهم بالرفض
كإنهم بيقولوا للموت لا
ميقبضش أرواحهم النهاردة
أو يديهم ساعة تانية على الأرض
فنحس ان التمثال اللي ماسك شنطة
بيعرض فلوسه للموت عشان يديله وقت أكتر
وبينتهي العرض ده بصياح الديك فوق
( ويُقال صياحه -بحسب رواية الإنجيل-
بيمثل إنكار القديس بطرس للمسيح 3 مرات
فبيفكر الناس بقول الحقيقة دائمًا )
