السلام عليكم ورحمة الله..

انا هدخل في الموضوع على طول لاني تعبت من التفكير ومش عارفه اعمل ايه..

انا متجوزه قبل سنتين بس بعقد عرفي ومش متوثق..

انا هدخل في الاسئلة على طول..

1ايه السن القانوني اللي يسمح للبنت انها تجوز نفسها منغير ولي الامر علما بأنه مش جواز اجانب ولا حاجه(احنا الاثنين مصريين واحنا الاثنين مسلمين والفرق في العمر 8 شهور)وبالنسبة للراجل هل في سن معين ليه هوه كمان؟؟

2هل توثيق عقد الجواز العرفي يقدر يمنع أهل الفتاة من انهم يرفعو دعوا ضد جوزها وياخدوني منه بالعافيه محاكم بقى وكدا؟؟

3في حالة لو كان السن القانوني 21 سنه زي ما بسمع..هل نقدر اننا نعمل عقد الجواز العرفي نوثقه يعني كحل مؤقت لغاية ما اكون 21 وبعدين نرجع نعمل عقد تاني شرعي؟؟

4ايه الاضرار اللي ممكن تواجهنا؟؟يعني هل فعلا جوزي ممكن يتحبس فيها لو وثقنا جوازنا؟؟

5هل ممكن نطلع بطاقات شخصية بعديها او أي حاجه تثبت اننا متجوزين؟؟يعني ايه الاجرائات اللي المفروض ناخدها والاحتيطات؟؟

6هل بس الاوراق اللي هنحتاجها للتوثيق هيه1بطاقه شخصية2شهادة ميلاد وبس ولا فيه حجات تانيه؟

7انا بطاقتي الشخصية اللي طالعالي في الامارات تنفع ولا لازم اعمل بطاقة في مصر؟

وفي الاخر انا اسفه اوي اني طولت اوي كدا بس احنا بجد مش عارفين نعمل ايه ياريت بليييييز اخد استشارت المحاميين او اي حد يعرف معلومات عن الموضوع دا بس انا عايزه اسمع من المحاميين اكتر عشان اعصابنا تهدا..بليييز ياريت تردو عليا لان ردكم عليا هيحسم حجات كتير اوي وقرارات مش عارفين ناخدها انا وهوه وهيحدد كمان اتكل على الله وانزل ونعمل الموضوع دا ولا لأ...ياريت اللي يردو عليا يكونو متأكدين مليون في الميه..لانه هوه كمان سأل محامي في الغردقة واعد يقولو حجات كتيره ومافهمتش حاجه لا انا ولا هوه وقفلها في وشنا وحسسنا ان الدنيا سودا..معلش انا اسفه كمان مره