بجد مشكلتى عويصة مع التجنيد لانى مش عارف اعمل ايه وتتحل ازاى انا هاحكى الموضوع بالظبط ويارب الاقى الجواب .. انا من مواليد 20/8/1977 يعنى عندى 33 سنة وليا اخوات اتنين صبيان واحد مواليد سنة 82 لكن اتقيد فى شهادة الميلاد لظروف خاصة سنة 84 شهر اتنين والتانى اتولد فعلا فى سنة 84 برضو شهر ستة فاصبح رسمى انا ليا اتنين اخوات الفرق بينهم تقريبا اربع شهور والوالد متوفى من زمان وانا كبير اخواتى وقدمت ما يثبت انى رشيد عائلة وروحت التجنيد سنة 98 علشان اشوف موقفى من التجنيد وبعد دوخة بسبب ان ازاى يبقى فى فرق بين اتنين اخوات اربع شهور خدت تأجيل بخمس سنين ينتهى فى 2003 وراحو اخواتى بعد ماخد كل واحد فيهم شهادة دبلوم التجارة برضو قدموا اوراقهم وكل واحد خدت تأجيل ب 3 سنين ولما خلصوا راح برضو كل واحد فيهم وخدت الاعفاء النهائى من التجنيد ...المشكلة بقى ان انا كان مفروض اروح سنة 2003 بعد التأجيل اللى بخمس سنين بتاعى ما خلص لكن انا ماروحتش .. وبمنتهى الصراحة لكذا سبب اولهم انى ساعة ماروحت اول مرة عانيت الامرين مش بسبب المعاملة السيئة وبس لكن ضيف عليهم السخرية والاذلال والمرمطة والشحططة بسسب موضوع اخواتى ده ... والسبب التانى وبمنتهى الامانة ان كنت فعلا مش فاهم وكان الكل بيقولى تأجيل بخمس سنين يبقى انت كده معافى نهائى ومش هاتدخل ده مجرد روتين وكلام من ده كتير اتمليت بيه دماغى وانا عارف طبعا ان كل دى مش اسباب وجيه بس هو ده فعلا اللى حصل .. والنتيجة ان بقى عندى 33 سنة ومش عارف موقفى من التجنيد ايه وفات سبع سنين على ميعاد انى اروح واعرف ان كنت داخل ولا مش داخل .. طب حل الموضوع ده ايه .. ايه الخطوات اللى مفروض اعملها ..وانا كده موقفى ايه .. هارب من التجنيد . ولا معافى . والله ما عارف . ونفسى اعرف الحل . لان الموضوع ده عاملى مشكلة فى كل امور حياتى . تقريبا حياتى واقفة مش عارف اخد اى خطوة فى اى حاجة .. يارب بتمنى بجد الاقى الحل