مذكرات مراهق ...
الجزء الـــــــرابـــــع
>> اعتصام << اجاجاجاجا
تم تشكيل وفد رفيع المستوى بقيادتي بصفتي مفجر الفكرة ويضم الزرقاوي وجيفارا والخبرة ورفض أحمد كمال ( اللي جايب شعره على جنب ) أن ينضم للوفد
وتوجت هذه اللجنة الرباعية إلى مكتب العميد الذي رفض سكرتيره دخولنا لأن هذه المشكلة تخص وكيل الكلية لشؤون الطلاب فتوجهنا إليه على الفور فرفض سكرتيره دخولنا أيضاً وأشار علينا بالتوجه لرئيس قسم الرياضيات والفيزيقا الهندسية ( إعدادي هندسة ) ولحسن الحظ لم نجد سكرتيره فدخلنا مباشرة
وبعد إن استمع إلينا في عجالة تغير وجهه بشكل غريب وقال صارخاً
نعم يا خفيف انت وهو ؟
عاوزين تغيروا نظام الكلية اللي بقاله 100 سنة عشان معندكومش بنات ؟ طول عمر مجموعة (أ) فيها بنات إشي أسماء على أماني على إيمان على أم عبده
رد جيفارا بسخط : راحوا مجموعة (ب ) عشان عدد اللي اسمهم أحمد كتير جدا
قاطعه بحدة : وأنا اعملكم ايه يعني يلا ياد منك ليه روحوا ذاكروا عندكم كويزات ف السكاشن كمان اسبوعين
ساد صمت رهيب بعد أن تحدث إلينا بهذه الطريقة وتوقعنا أن الجملة التالية ستكون
إطلعو بره مكتبي
لكن ما حدث هو أن لملم الدكتور أشياءه بسرعه ليلحق بأوتوبيس الكلية المتجه للشيخ زايد
وعدت أنا وباقي أعضاء اللجنة الرباعية لزملائنا في المدرج نجر أذيال الخيبة نحاول أن نتجنب تساؤلاتهم وكان أكثرنا تماسكاً هو الخبرة الذي أمسك بالمايكروفون وقال بنبرات حزينة
مطالبنا اترفضت يا رجالة لازم نشوف حل تاني وندعوكم للاجتماع السري التاني تحت مبنى عمارة بردو بكرة بعد المحاضرة التالتة
عشان نشوف حل للمصيبة دي
وبدأ الإجتماع السري الثاني ولكن اليأس الذي علا الوجوه منع كل الطلاب من الكلام حتى الخبرة الذي كان أكثرنا تماسكاً لم يقو على النطق بكلمة واحدة فقمت أنا وقلت بنبرة تحدي
زملائي الأعزاء مبقاش قدامنا دلوقت مع الإدارة اللي مش بتحترمنا ولا بتحترم رغباتنا إلا أسلوب لوي الدراع أنا بفكر إننا نعمل اعتصام في الجبلاية ( أوسع حتة في الكلية ) لحد ما الإدارة تستجيب لمطالبنا
واهتز مبنى عمارة فجأة بهتافات الاستحسان التي انطلقت من الأفواه اليائسة بعد أن أعطتها تلك الكلمات بعض الأمل في حياة أفضل
وحملوني على الأعناق وتوجهنا إلى الجبلاية وافترشنا الأرض معلنين بدء الاعتصام
ومرت ساعات ولم يعرنا أحد انتباهه إلى أن أظلمت الكلية وجاء أحد الفراشين وقال لنا
روحوا يا بشمهندسين الدنيا ضلمت ومش هتعرفوا تكملو المنظور النهاردة ابقو كملوه بكرة
وتركنا وسط تساؤلاتنا وانصرف فهرعت إلى الخبرة وسألته
منظور إيه اللي بيتكلم عنه
ضرب جبهته بكف يده بشده وقال
يالهوي افتكرونا طلاب عمارة وجايين ناخد منظور لمبنى 4 إحنا غلطانين كان لازم نعمل يفط أو أي حاجة تفهم الناس احنا مين وعاوزين ايه ... بص يا كبير احنا نروح النهردة وبكرة نيجي فطرانين كويس عشان هيبقى اعتصام واضراب عن الطعام كمان عشان نضغط عليهم أكتر وأنا هظبطلك أحلى يفط
نظرت إليه بامتعاض متقمصاً دور الزعيم ولوحت بيدي بازدراء قائلاً:
خلاص قول الكلام ده للرجالة وظبط حالك بكرة مش عاوز غلطات خلينا نخلص من المصيبة دي
فأطرق الخبرة رأسه وقال : أوامرك يا كبير
وانفض الاعتصام وتوجه معظم الطلاب الى المطاعم المنتشرة في ميدان الجيزة لملء بطونهم من الأطعمة المختلفة استعدادا لإضراب لا يعلم أحد منا كم ستكون مدته ؟؟
#بوابه_المتولي
الي اللقاء في الجزء قبل الاخير ( الخامس )