X

اول من سُمي ( محمد ) في التاريخ

المنتدى الاسلامي

 
  • Filter
  • Time
  • Show
Clear All
new posts
  • 4uonly
    Thread Author
    Free Membership
    • Nov 2018 
    • 899 
    • 376 
    • 61 


    لو سألت مين اول من سُمي ( محمد ) في التاريخ
    طبعا بديهيا الإجابة هتكون
    ( سيدنا محمد عليه الصلاة والسلام ) طبعا

    قبل سيدنا الرسول ( محمد )
    كان فيه مجموعة من اصحاب إسم ( محمد )
    في مكة و المدينة ، و هما دول بالترتيب :

    1- محمد بن سفيان بن مجاشع بن دارم بن مالك
    بن زيدى مناة بن تميم
    و ده كان أسقف مسيحي و يبقا جد الفرزدق الشاعر
    و بينه و بين سيدنا محمد اربع اجيال
    2- محمد بن الحرماز بن مالك بن عمرو بن تميم
    3- محمد بن بر بن طريف بن عتوارة بن عامر بن ليث
    بن بكر بن عبد مناة بن كنانة
    4- محمد الشويعر بن حمران بن أبي حمران الجعفي
    5- محمد بن عقبة بن أحيحة بن الجلاح الأوسي
    6- محمد بن مسلمة الأنصاري الأوسي
    7- محمد بن خزاعى
    و ده جه مع ابرهة الحبشي في حادثة طير الابابيل معاه
    و مات معاه
    8- محمد الجشمي في بني سواءة
    9- محمد الفقيمي
    10- محمد الأسيدي

    وسبب التسمية ان آبائهم كانوا في رحلة الشتاء التجارية
    للشام في فترة من الفترات
    و هناك نزلوا ضيوف على شوية رهبان مسيحيين
    و الكلام خد بعضه مع الرهبان
    لما الرهبان عرفوا انهم من مكة
    عرفوا منهم ان فيه نبي هيبعث في ارض العرب اسمه محمد
    و اد ايه هيكون ليه شأن عظيم
    وان محمد ده خلاص قرب ظهوره وعلاماته بانت

    الرجالة بقا من كتر حلاوة الكلام واقتناعهم
    تمنوا لو كان النبي ابن حد فيهم
    تعاهدوا مع راهب منهم ان كل واحد هيسمي ابنه
    اللي هيتولد بعد الرحلة دي ( محمد )
    لما رجعوا الجزيرة العربية
    اللي مراته حامل و خلفت سمى ابنه محمد
    و اللي خلف بعدها عمل كدة بردو
    يمكن يكون من حظه و نصيبه
    و سبحان الله محدش في دول كان صالح وينفع يبقا نبي
    الا اتنين بس ،:
    ( محمد بن مسلمة )
    و دا لما الرسالة ظهرت بقا من الصحابة الكبار
    و ( محمد بن عقبة بن أحيحة بن الجلاح )
    امه تبقا سلمى بنت عمرو النجارية
    دي كانت متجوزة ابوه عقبة بن أحيحة و وقع بينهم خلاف
    فطلقها و هاجر الشام بعد الطلاق و مات هناك

    بعدها بشوية كان احد الرهبان جه على مكة
    يشوف فيه حد من دول بقا هوا النبي ولا لا
    لقاهم كلهم فاسدين وفجرة وبيشربوا خمر وبيعبدوا آلهة
    ما عدا محمد بن عقبة بن أحيحة

    لما راح يسأل سلمى عن محمد
    افتكرت انه عايز ياخد ابنها منها و يوديه لطليقها في الشام
    فا اتخانقت معاه
    محمد شافها بتتخانق راح متخانق هوا كمان
    ومسك فيه وضربه بتعصب الجاهلية
    الراهب بقا عرف انه هوا كمان مش النبي
    لان من مواصفات النبي الحلم و الصبر
    فا راح هداها و فهمها القصة
    بعد سنة
    سلمى كانت ساكنة في يثرب عند اهلها بنو النجار
    فرأت شاب ...اسمه هاشم بن عبد مناف
    اصغر اولاد عبد مناف ،جد الرسول الكبير فتزوجها
    ولان هاشم كان كبير قريش
    سابها مجبرا عند اهلها بنو النجار في يثرب
    ورجع عشان يشوف باقي شغله ومسؤلياته على وعد بالرجوع

    و رجع على مكة ، لكن مقدرش يرجع لزوجته تاني

    هاشم راح على الشام في رحلته التجارية المعتادة
    ولما وصل ، جاله تعب ، ومات في غزة
    في الوقت ده كانت حملت منه ومكنش هوا يعرف
    و خلفت ولد سمته ( شيبة )
    عشان كان فيه شعرتين بيض في راسه

    اتربى شيبة في بيت ابوها في يثرب
    مع اخوه الغير شقيق محمد بن احيحة و امه سلمى
    و محدش من قريش كان عارف ان ليهم ابن في يثرب
    حب شيبة اخوه محمد جدا و جدعنته و فروسيته
    و كان اكتر من ابوه و اخوه
    و كبر شيبة و بقا شاب ، و مات محمد بعدها

    عدت شهور ، وخبر شيبة وصل لمكة عن طريق التجار
    و اتفاجئت سلمى ان اخو جوزها الكبير
    ( المطلب بن عبد مناف ) عرف القصة وجالها المدينة
    و عايز ياخد ابن اخوه يتربى مع اهل ابوه في قريش
    فا فضلت تترجاه، لكن هوا رفض
    و خده معاه مكه عشان يعيش وسط اهله وقبيلته

    لما دخل المطلب مكة ، و وراه ابن اخوه شيبة
    الناس استقبلته كونه زعيم قريش وقتها خلفا لهاشم
    و شافوا شيبة فا فضلوا يشاوروا عليه و يقولوا :
    ( عبد المطلب ، عبد المطلب )
    يعني العبد بتاع المطلب الجديد
    عبد المطلب عمره ما نسي اخوه الاكبر محمد بن أحيحة
    اللي رباه وعلمه وحبه
    و بالرغم انه خلف عشر ابناء
    الا انه اختص حفيده الاقرب لقلبه بإسم اخوه الاكبر

    خاصه انه ابن ابنه الفقيد الحبيب عبد الله
    فا سماه على اسم اغلى الاشخاص على قلبه ايضا
    سماه : محمد
    و ما زاد من التأكيد على الاسم
    الحلم اللي حلمه كمان بعدها
    واللي افتكر بيه اخوه الغير شقيق
    فا اصر على تسميته : محمد
    متجاهل استغراب اعمام الطفل من الاسم
    فلم يكن يعرف احدا منهم القصة الحقيقية وقتها

    المصادر :
    (1)الروض الأنف ، 2/92
    (2) البداية والنهاية ، 2/690
    (3) سبل الهدى والرشاد ، 1/503
    (4) فتح البارى ، 6/556.٧






Working...
X