همسة محب
طول مانت واقف قدام اللبن عشان يغلي مش هيغلي
أول ما تلف وشك تعمل حاجه ترجع تلاقيه فار
وطول مانت واقف قدام القهوة عشان تستوى
الوقت بيطول والاعصاب بتتعب
مسافة ما تروح ع الحوض تغسل ايدك
تسمع صوت فوران القهوة بتطفى النار تحتها
كان حد قال مره مستدل من الفكره دي
تعريف جميل للصبر :
هو فن العثور علي شئ آخر تقوم به ..
أوقات بيكون الصبر مر عشان أنت قاعد مركز جدا
علي حدث معين مستنيه يحصل
وسنه الكون بتقول إن كل شئ لازم ياخد وقته الطبيعي
فتركيزك ده
بيصعب عليك الصبر ويحسسك بطول المده جدا
علي عكس لو كنت شاغل نفسك بحاجات تانيه
أول لما ييجي لك الفرج هتحس أنه جه ف وقته
بالظبط لأنك مكنتش مركز معااه
مفيش فرج بيتأخر
انت الي مركز مع المصيبة
حاول يكون عندك ( مؤانسه للزمان )
يعني الوقت إللي ما بين الحدث والفرج
إستغله قدر الإستطاعة
فى حاجات تنفعك لإنك كده كده هتعيشه